දකුණු ආසියානු තාක්ෂණික හා වෛද්‍ය අධ්‍යාපන ආයතනය (SAITM) 2008 වසරේ එහි ආරම්භය සඳහා පිඹුරුපත් සැකසීමේ සිට මහත් මතභේදයට තුඩු දුන් මාතෘකාවක් බවට පත් වී ඇත. ආරම්භයේ සිටම එහි ක්‍රියාදාමය ශ්‍රී ලංකා වෛද්‍ය අධ්‍යාපනයට මෙන්ම, සමස්ත සෞඛ්‍ය ක්ෂේත්‍රයට එල්ලවන දැවැන්ත තර්ජනයක් බවට පත් වී ඇති අතර එමගින් 1950 වර්ෂයේදී ඉන්දියාවේ පෞද්ගලික වෛද්‍ය ආයතන පිහිටුවීමත් සමග එරට සෞඛ්‍ය ක්ෂේත්‍රය තුල ඇති වූ දැවැන්ත පසුබෑමෙහි අඳුරු සේයාවන් පෙන්නුම් කරයි. ශ්‍රී ලංකාවේ ප්‍රථම පෞද්ගලික වෛද්‍ය අධ්‍යාපන ආයතනය ලෙස උතුරු කොළඹ වෛද්‍ය විද්‍යාලය 1980 වසරේදී පිහිටුවීමත් සමග පෞද්ගලික වෛද්‍ය අධ්‍යාපනය පිළිබඳ සමාජීය හා දේශපාලනික වශයෙන් විශාල කතිකාවතක් නිර්මාණය විය. අවසානයේදී එහි ප්‍රතිඵලයක් ලෙස එය ජනතා අයිතියට පත් කරන ලදි. එබැවින් මෙම අර්බුදය හමුවේදී ද වඩාත් වැදගත් සාධකය බවට පත්වන්නේ, තවදුරටත් ව්‍යාකුල වීමට පෙර මෙම ගැටලුව නිරාකරණය කිරීමයි.SAITM ආයතනය ස්ථාපනය කිරීමේ හා කළමනාකරණය කිරීමේ ක්‍රියාපටිපාටිය සිතාමතාම අතපසු කිරීම හෝ නොසලකාහැරීම හේතුවෙන් පැනනැගුනු අක්‍රමිකතා රාශියකින් යුක්ත වේ. මෙම ආයතනය වාණිජ පරමාර්ථ මුදුන්පත් කර ගැනීම සඳහා මහජනතාව මෙන්ම ඔවුන්ගේම අධ්‍යාපන ආයතනයේ සිසුන් ද මංමුලා කර ඇත.
බොහෝ වෘත්තිය සංවිධාන මෙම වංචනික ආයතනයට විරුද්ධව නිසි පියවරක් ගන්නා ලෙස බලකර සිටියද වගකිව යුත්තන් ඒ පිලිබඳ මුනිවත රැකීම මතභේදයට තුඩු දී ඇති කරුණකි.
මෙරට පවතින වෛද්‍ය අධ්‍යාපනයේ ගුණාත්මකභාවය පිරිහී යාමත් සමග ඉන් ජීවිත අවධානමකට ලක් වන්නේ ගුණාත්මක වෛද්‍ය සේවයක් අපේක්ෂාවෙන් පැමිණෙන අසරණ රෝගී ජනතාවයි. එසේම ශ්‍රී ලංකා වෛද්‍ය සභාවේ ස්වාධිපත්‍යයට හානි කිරීම රටේ වෛද්‍ය අධ්‍යාපනයත්, සෞඛ්‍ය ක්ෂේත්‍රයත් විනාශ මුඛයට අද දැමීමේ පළමු පියවර වනු ඇත.
සයිටම් ආයතනය ස්ථාපනය වීමත් සමග තවත් එවැනි ආයතන කිහිපයක්ම මෙරටට පැමිණීමට මාන බලමින් සිටින අතර, ඉන් මාරු පහර එල්ල වන්නේ මෙරට රාජ්‍ය විශ්ව විද්‍යාල පද්ධතියටයි.
තවද කුසලතාවයට වඩා මුදල් බලයට ප්‍රමුඛතාවය හිමි වීම තුලින් නිදහස් අධ්‍යාපනයට සහ වෛද්‍ය අධ්‍යාපනය ලැබීමේ සුජාත උරුමය වන දක්ෂතාවය දෝතින් දරා ගත්, එහෙත් අතමිට මුදල් නොගැවසෙන දරු පරපුරක අවිහිංසක අනාගත බලාපොරොත්තු වලට මාරු පහරක් එල්ල වේ. එසේම SAITM මගින් සැපයෙන භයානක පූර්වාදර්ශය සහ එහි ප්‍රතිවිපාක තුලින් ශ්‍රී ලංකාවේ ජීවනාලිය බඳු වූ නිදහස් අධ්‍යාපනය සහ නිදහස් සෞඛ්‍යය සදහටම මියැදෙනු ඇත.
No comments:
Post a Comment